Where It Starts — საიდან დაიწყო ყველაფერი

ეს ვიდეო დაახლოებით ერთი წლის წინ შევქმენი — იმ პერიოდში, როცა გადავწყვიტე, რომ ჩემი ცხოვრებისა და კარიერის მიმართულება შემეცვალა. მანამდე მქონდა კორპორაციულ გარემოში მუშაობის გამოცდილება, თუმცა მივხვდი, რომ მხოლოდ სტაბილურობა აღარ იყო ის, რასაც ვეძებდი. მინდოდა უფრო თავისუფალი, მოძრავი და შემოქმედებითი ცხოვრება — ისეთი, სადაც შემეძლებოდა ადამიანებთან ურთიერთობა, საუბარი, იდეების მოფიქრება, გადაღება, შექმნა და საკუთარი ხედვის გამოხატვა. სწორედ ამ პერიოდიდან დავიწყე იმის ძიება, თუ რა მინდა რეალურად გავაკეთო. ეს ვიდეო არ არის უბრალოდ სხვადასხვა კადრის ერთობლიობა. ჩემთვის ეს არის ისტორია იმ მომენტზე, როცა ჯერ კიდევ არ ვიცოდი ზუსტად, სად მივდიოდი, მაგრამ უკვე ვიცოდი, რომ ძველი გზით გაგრძელება აღარ მინდოდა. ვიდეოში ვსაუბრობ იმაზე, რაც მიყვარს — მოძრაობაზე, ახალი გამოცდილებების მიღებაზე, ადამიანებთან ურთიერთობაზე, შექმნაზე, დიზაინზე, გადაღებაზე და ისტორიების მოყოლაზე. ვიდეო ინგლისურ ენაზეა და მისი მთავარი მიზანი არ ყოფილა უბრალოდ ლამაზი კადრების ჩვენება. მინდოდა, საკუთარი გამოცდილება და ემოცია სიტყვებითა და ვიზუალით გადამეცა და მაყურებელთან პირადი კავშირი შემექმნა. სწორედ storytelling არის ის ნაწილი, რომელიც ჩემთვის ყველაზე მნიშვნელოვანია — როგორ შეიძლება ჩვეულებრივი გამოცდილება გადაიქცეს ისტორიად, რომელსაც ადამიანი საკუთარ თავთან აკავშირებს. ეს პროექტი ჩემთვის ერთ-ერთი პირველი მცდელობა იყო, რომ საკუთარი თავი არა მხოლოდ კადრებით, არამედ საკუთარი ხმითა და ისტორიით გამომეხატა. დღეს, როცა უკვე ვქმნი და ვაქვეყნებ ახალ ვიდეოებს, ვხვდები, რომ ეს სწორედ ის წერტილი იყო, საიდანაც ყველაფერი დაიწყო.